عشر العاب شكلت تاريخ الالعاب كما نعرفه الان

الالعاب بدأ ظهورها بشكل فعلى من حوالى 50 سنة ... ظهر خلالهم الاف الالعاب على مختلف المنصات ...
 و لكن خلال الفترة دى وحتى الان ..كان دايما فيه العاب كانت بمثابة حجر الاساس او المنارات اللى اهتدت بيها بقية الالعاب و كانت السبب فى تغيير شكل الالعاب لتصل للشكل اللى احنا فيه الان

1-DOOM  تاريخ الاصدار 1993

لا يمكن ان نتخيل شكل العاب ال FPS  بدون وجود لعبة DOOM ... فلعبة DOOM  تعتبر بدون منازع هى اللعبة اللى فتحت الباب على مصراعيه للجيل الجديد من الالعاب ... لعبة  DOOM  غيرت المنظور التقليدى للالعاب ...فبعد ان كان اللاعب معتاد على اللعب بطريقة ال 2D  وجد نفسه في لعبة  3D  حقيقية يستطيع فيها التحرك 360 درجة و التفاعل بشكل كامل مع اللعبة...صحيح ان كان فيه لعبة سابقة ليها و هى Wolfenstein  ....لكن DOOM  فى الحقيقة قفزت بمراحل تطور الالعاب سنين ضوئية للامام

2- Grand Theft Auto   تاريخ الاصدار 1997

دجاجة Rockstar  التى تبيض ذهبا ,لعبة  GTA  غيرت المفهوم التقليدى للالعاب بحيث انك تلعب بصورة البطل او الفارس الشجاع او الجندى الخارق او المحارب النبيل ...  لعبة  GTA  صدمت الجميع انها جعلت اللاعب يكون بدور اللص الحرامى اللى متاح ليه مدينة بالكامل لاكتشفاها (( او تدميرها ^^)) .... لعبة GTA ببساطة  هى اول لعبة تعطى اللاعب الحرية الكاملة فى فعل ما يريد وقت ما يريد سواء كان اللى انت عايزه انك تسرق اى سيارة فى الشارع و تاخدها لنفسك ... او انك تقتل المارة المسالمين بدون اى سبب سوي انك تريد فعل ذلك .... او حتى انك تاخد دبابة و تدمر بيها كل اللى يقف فى طريقك ....الفكرة كانت صادمة جدا و لكن بالرغم من دة اللعبة حققت مبيعات فاقت اقصى طموحات شركة روكستار نفسها خصوصا الجزء الثالث من اللعبة اللى حقق اعلى تقديرات على ال PS 2 لم تستطع اى لعبة ان تحطمه حتى هذه اللحظة ....

3- World of Warcraft تاريخ الاصدار 2004

اذا ذكرت العاب ال MMORPG  ذكرت  WoW  ....  اللعبة دى هى السبب فى وجود العاب ال MMORPG  كما نعرفها الان ... و كل الالعاب الاونلاين بتحاول تكتشف سر نجاح WoW  اللى خلاها سنة 2010 يوصل عدد المشتركين فيها ل 12 مليون مشترك ... تخيل معى لعبة واحدة يلعب فيها 12 مليون شخص حول اللاعب كل شخص منهم يدفع 14 دولار شهريا ....و دة اللى جعلها اكتر لعبة فى العالم حققت مكاسب و ما زالت تحقق المزيد .... فرغم ان اللعبة صدرت من 2004 و لكنها مستمرة حتى هذه اللحظة و ما زال الملايين يلعبوها لدرجة الادمان ...بل ان فيه قصص طريفة كتير عن اشخاص اتجوزوا من جوا اللعبة و اولادهم دلوقتى بيلعبوها معاهم ... عشان كدة بعد صدور لعبة  WoW  اكتشف مصممين الالعاب ان عامل اللعب مع انسان مثلك دايما بيكون محفز و ممتع اكتر من اللعب قصاد الكمبيوتر و الذكاء الصناعى .... و بعد نجاح  WoW  بدات العاب كتير جدا تظهر تحاول تحقق نفس النجاح ... و لكن حتى هذه اللحظة لم تستطع اى لعبة ان تزيح  WoW  من على عرش العاب ال MMORPG

4- Metal Gear Solid  تاريخ الاصدار 1998

لعبة  Metal Gear Solid  هى اول من ادخل اسلوب التخفى و التسلل فى الالعاب ... مش مجرد كدة و بس ...لا دة كمان ادخلت عمق فى القصة و بعد درامى جعلت كل من يلعبها يتعلق بقصتها من اول لحظة .... قبل Metal Gear  كان الاسلوب التقليدى فى اللعب هو انك تجري ناحية الاعداء و تقتلهم فى اسرع وقت فى معركة مع الازرار ... و لكن Metal Gear  جعلت كل معركة محتاجة منك تخطيط و تفكير ... امتى تقتل حارس بايديك العاريتين بصمت ... امتى تكسر الكاميرا عشان تقدر تعدى بدون ما حد يشعر بيك ... امتى تستخدم مسدس صامت و امتى تستسخدم كل اسلحتك الفتاكة مباشرة .... باختصار Metal Gear  اعطت مثال ان العاب الفيديو ممكن تحتاج منك تشغيل عقلك و كمان يكون ليها قصة مؤثرة و مش مجرد ضغط متواصل على الازرار

5- Super Mario Bros  تاريخ الاصدار  1985

اعظم لعبة فى تاريخ الالعاب .... هو دة وصف  IGN  للعبة Super Mario  سنة 2005 ... و فعلا تستحقها عن جدارة ... فلعبة Super  Mario تعتبر اللعبة المشتركة بين ابناء جيل الثمانيات و التسعينات ... فنادرا ان تجد اى شخص من هذا الجيل لا يعرف من هو Super Mario .... حققت اللعبة ايرادات اسطورية و ظلت متربعة على عرش اعلى لعبة محققة ايرادات فى العالم لمدة 30 سنة .. و كانت هى اكبر سبب ان شركات كبري تستثمر فلوسها فى تجارة صناعة الالعاب

6- Wii Sports  تاريخ الاصدار 2006

صدق او لا تصدق ... و لكن اكبر لعبة حققت اعلى مبيعات فى التاريخ و استطاعت ان تزيح Super Mario  من على عرشها هى  Wii Sports  ... و لم لا فاللعبة بالفعل ادخلت اسلوب عصري مبتكر و مختلف تماما فى الالعاب ... فهى اول لعبة تستطيع ان تلعب بها بحركات يدك نفسها ... اسلوب لم يجذب فقط صغار السن ... و لكن جذبت كل الاعمار ... فهى اول لعبة تجد فيها الاب و الام و الابنة و حتى الجدة يلعبوا سويا نفس اللعبة و يشعروا انها بيتشاركوا مع اولادهم تجربة جديدة و مثيرة بدون الدخول فى تفاصيل الالعاب المعقدة التى يكرهها الاباء.. اسلوب لعب  Wii  شجع منصات العاب عملاقة زى Playstation  و XBox  انهم يضيفوا النوع دة من الالعاب لمنصاتهم ...و لكن الفضل الاول لادخال نظام اللعب الديناميكى فى الالعاب يرجع ل Wii

7- The Sims تاريخ الاصدار 2000

لعبة  Sims  نجحت نجاح منقطع النظير بسبب اسلوبها المبتكر .. فعكس بقية الالعاب اللى بتتحكم بيها بشخصية او عد شخصيات .... هنا انت تتحكم فى عالم باكمله و بتتفاعل معاه و مع شخصياته ...فانت ممكن تبنى بيت و تؤثثه و تتحكم فى افعال شخصياته اليومية من اكل و شرب و عمل و دراسة و هوايات و حتى الحب و الزواج .. من الاخر بتبنى عالم خاص بيك انت بتكون مسيطر عليه بالكامل لدرجة انك تتعلق بشخصياته اللى عشت معاهم حياتهم بنفسك ... و ما يميز لعبة Sims  انك مستحيل تلاقى شخصين لعبوا اللعبة بنفس الاسلوب و ان اللعبة فعليا ملهاش نهاية

8-  Medal of Honor  تاريخ الاصدار 1999

اللعبة الام التى خرج من رحمها كل العاب الحروب سواء Call of Duty  او battle field  او Spec Ops  ... عشان كدة اللعبة دى قدرت تحصل بجدارة على اكتر لعبة  FPS  حققت مبيعات على مستوى العالم ... و المميز فى لعبة  Medal Of honor  انها حتى الان ناس كتير مازالت بتلعبها فى طور اللعب الجماعى رغم ان محرك الجرافيك الخاص بها عفى عليه الزمن

9- Resident Evil  تاريخ الاصدار 1996

من منا لم يقفذ من مقعده و هو يلعب Resident Evil  .... اول لعبة تدخل معنى الرعب الحقيقي للالعاب و تحقق نجاح مبهر لدرجة ان اللعبة اتعمل عنها سلسلة افلام مقتبسة من اللعبة .... و العنصر المميز فى لعبة  Resident Evil  انك كنت مجبر انك تستخدم عدد محدود جدا من الرصاص و عدد محدود من ال Potions  ...فكل طلقة تطلقها لازم تعمل حسابها و كل نقطة صحة تفقدها لازم تحاول تعوضها ...حتى العضة لازم تحاول تعالج نفسك منها فى اسرع وقت .. دة غير الالغاز اللى بتقابلك مع كل خطوة و بتحتاج منك تركيز و تفكير... و يمكن هو دة كان السبب الاكبر فى نجاح الاجزاء القديمة من اللعبة ...لانك كنت بتمشى على اطراف اصابعك مع كل خطوة بتخطيها فى اللعبة

10- Elder Scrolls تاريخ الاصدار 1994

سلسلة Elder Scrolls  هى من وضعت حجر الاساس لكل العاب ال RPG  اللى اتت بعدها ... وقت بداية ظهور اللعبة كان طفرة فى عالم الالعاب بحجم بيئة لعب هائل فى وقتها ..فاول جزء كان يحتوى على 15000 مدينة و عدد سكان يتجاوز ال 750 الف نسمة .. و لكن الطفرة الاكبر بدات مع ظهور لعبة Elder Scrolls : Morrowind عام 2002  ...فاللعبة دى كما افصح مصمميها ان لو شخص واحد عملها كان هيحتاج 100 سنة شغل متواصل ...
و كان بسبب اللعبة دى ان Bathedia  ضاعفت عدد موظفيها 3 اضعاف و كان كلهم شغلهم الوحيد هو اخراج  Morrowind للنور عشان كدة اللعبة قدرت تحصد 60 جائزة بعد صدورها منهم  Game Of the Year