asus

آخر الأخبار

أخبار

وداعًا ‏احمد ‏يسري


طبعًا ديه أول مرة أنزل خبر باللهجة العامية بتاعتنا هنا بس مكنش ينفع يتكتب إلا بالطريقة ديه بصراحة. بعد 5 سنين و3 شهور بالظبط، جه الوقت عشان اشوف رحلة جديدة ومختلفة.

لو متعرفنيش أو مش بتهتم إنك تقرأ أسماء الناس الي بتكتب الأخبار والمقالات فأنا أحمد يسري الي بنقلكم الأخبار والتسريبات على الموقع هنا من شهر أبريل 2016 لحد النهاردة 31 يوليو 2021. 5 سنين و3 شهور عدوا عليا بشكل سريع بصراحة ومحستش بيهم، السبب الرئيسي يرجع لإني كنت شغال مع team من الأفضل هنا في مصر.

خلال السنين الي فاتت انا اتعلمت حاجات كتير من الموقع ده وخبرتي كلها اكتسبتها بسبب الـ team الي اشتغلت معاه، مينفعش طبعًا أنسى أذكر الدعم المستمر الي اتقدملي من أستاذ محمد نصر وأستاذ أبو بكر ومصطفى عبد القادر، الصداقة والمعرفة الي اتقدمولي من مصطفى عرجون وبقى من أقرب أصدقائي، ده غير كمان team صفحة الـ Facebook وإدارته المميزة الي قدمت إقتراحات ودعم مستمر طوال سنين الي فاتت ( أستاذ عمرو الشرقاوي ومحمد شاكر وغيرهم كتير ).

بعتذر لو نسيت أذكر إسم أي حد بس خليكم عارفين إن كلكم كنتم السبب في تطوري في المجال ده. أكيد مش هينفع أنسى الـ Fans الي هما قرأوا مقالاتي خلال اخر 5 سنين وبعتولي نقد سواء كان بناء أو هدام، أي نقد ساعدني أطور من نفسي ومن غيركم أنا مكنتش هبقى في مستوايا الحالي وحقيقي شكرًا ليكم من كل قلبي.

للناس بقى الي تعرفني على المستوى الشخصي فمتقلقوش، أنا مش هخرج طبعًا من مجال صحافة الألعاب، لو حابين تتابعوني وتعرفوا ايه الي هيحصل في حياتي خلال الفترة الي جاية فا ده هو لينك الـ Facebook الخاص بيا.

في النهاية أنا بجد حابب أشكر كل الناس الي وقفت جنبي وساعدتني خلال السنين الي فاتت، فضل موقع Gamers Field عليا هيفضل موجود طول فترة وجودي في الصناعة ديه. أتمنى لإدارة الموقع والشباب الي هتشتغل بعدي إنهم يحققوا أفضل نجاح ممكن هنا ويعلوا بالموقع كمان وكمان. الموقع هيوحشني جدًا والله أعلم، لعل وعسى إني أرجع مرة تانية في المستقبل. لحد ما ده يحصل فا كلكم هتوحشوني و Farewell to you all.

- أحمد يسري
وداعًا ‏احمد ‏يسري Reviewed by Ahmed Yousry on يوليو 31, 2021 Rating: 5

ليست هناك تعليقات:

Gamers Field جميع الحقوق محفوظة ©2011-2018
DMCA.com Protection Status

اتصل بنا

الاسم

بريد إلكتروني *

رسالة *

يتم التشغيل بواسطة Blogger.